Anëtarja e LDK-së, Shqipe Pantina, ka reaguar lidhur me përfoljet për shitblerje të votave, të cilat thuhet se ndërlidhen me procesin e grumbullimit të nënshkrimeve për shkarkimin e kryetarit të kësaj partie, Lumir Abdixhiku.
Gjatë një lidhjeje direkte në emisionin "Click" të RTV21, Pantina u shpreh se zhvillimet e fundit brenda partisë, përkatësisht lobimi dhe diskutimet, janë pjesë e veprimtarisë normale të proceseve demokratike. Ajo mohoi në mënyrë kategorike se beson në pretendimet për shitblerje të votave për këtë qëllim.
"Është një proces. Lobimi dhe diskutimet janë normale. Nuk besoj në shitblerjen e votës. Mua nuk më ka kontaktuar askush për ta blerë votën", deklaroi Pantina. Ajo shtoi se, nëse ka individë të cilët disponojnë fakte për raste të tilla, ato duhet të denoncohen tek instancat përkatëse. Pantina ripohoi se nuk është kontaktuar personalisht nga askush për t'i kërkuar ose ofruar votën në këmbim të përfitimeve materiale apo politike.