Shqipëria dhe Bashkimi Europian zhvilluan në Bruksel dialogun e dytë në kuadër të Partneritetit për Siguri dhe Mbrojtje, në një kohë kur sfidat globale të sigurisë po bëhen gjithnjë e më të ndërlikuara.
Shqipëria rikonfirmoi linjëzimin me Politikën e Përbashkët të Jashtme dhe të Sigurisë të BE-së, duke theksuar rolin e saj si partner i besueshëm dhe proaktiv. Vendi mirëpriti nismat kryesore të BE-së për forcimin e kapaciteteve mbrojtëse dhe shprehu gatishmërinë për të kontribuar aktivisht, përfshirë pjesëmarrjen në misione dhe programe të përbashkëta.
Në fokus të diskutimeve ishte situata e sigurisë në Europë. Agresioni i vazhdueshëm i Russisë kundër Ukrainës përbën një kërcënim serioz për stabilitetin rajonal dhe global. Shqipëria rikonfirmoi solidaritetin e palëkundur me Ukrainën dhe përkushtimin për mbështetjen e paqes, sovranitetit dhe respektimit të së drejtës ndërkombëtare.
Sa i përket rajonit, u theksua se stabiliteti i Ballkanit Perëndimor është i lidhur ngushtë me sigurinë e gjithë Evropës. Shqipëria mbetet e angazhuar për promovimin e marrëdhënieve të mira fqinjësore, forcimin e bashkëpunimit rajonal dhe mbështetjen e procesit të integrimit evropian për të gjitha vendet e rajonit.
Në përfundim, zgjerimi i Bashkimit Europian u vlerësua si instrument strategjik kyç për garantimin e paqes, stabilitetit dhe prosperitetit afatgjatë. Shqipëria rikonfirmon vendosmërinë për të vijuar rrugën drejt anëtarësimit në BE, duke kontribuar në ndërtimin e një Europe më të sigurt, më të fortë dhe më të bashkuar.