Shqipëria është shpallur vendi lider në rajonin e Ballkanit Perëndimor për transparencën buxhetore, bazuar në rezultatet e Anketës së Buxhetit të Hapur 2025, të publikuara nga Partneriteti Ndërkombëtar për Buxhetin. Vlerësimi u bë i ditur nga Kryeministri Edi Rama gjatë podkastit “Flasim”.
Sipas të dhënave, vendi ka regjistruar një përmirësim të ndjeshëm në mekanizmat e raportimit dhe administrimit të fondeve publike. Shqipëria ka kaluar nga 38 pikë në vitin 2015 në 64 pikë për vitin 2025. Ky progres vlerësohet nga qeveria si pasojë e reformave të ndërmarra ndër vite, veçanërisht në proceset e digjitalizimit të shërbimeve dhe forcimit të standardeve të raportimit.
Kryeministri theksoi se ky rezultat është thelbësor për të ndërtuar besimin e qytetarëve dhe për të tërhequr investime të huaja, ndërsa vendi ndodhet në procesin e integrimit në Bashkimin Europian. Sipas Ramës, synimi i ardhshëm i qeverisë është tejkalimi i nivelit mesatar të shteteve anëtare të Bashkimit Europian, duke mos u kufizuar vetëm në pozitën udhëheqëse brenda rajonit.