Kryeministri Edi Rama, në komunikimin e tij javor, njoftoi se më 26 maj do të mbahet Konferenca Ndërqeveritare në Bruksel. Ky takim shënon përmbylljen zyrtare të fazës hyrëse të negociatave dhe hapjen e fazës përfundimtare të procesit të anëtarësimit të vendit në Bashkimin Europian.
Sipas kreut të qeverisë, ky avancim vjen pas një ballafaqimi të suksesshëm me Komisionin Europian mbi raportin e detyrave të kryera. Krahas zhvillimeve politike, Rama njoftoi disbursimin e një fondi prej 49 milionë eurosh për Shqipërinë nga Plani i Rritjes për Ballkanin Perëndimor. Ky fond e çon mbështetjen totale financiare të përfituar deri më tani në 212 milionë euro, vlerë e cila përfaqëson shumën më të lartë të përfituar nga vendet e rajonit në kuadër të këtij instrumenti.
Kryeministri deklaroi se financimi bazohet mbi rezultate konkrete dhe të certifikuara nga Komisioni Europian. Gjatë deklaratës së tij, ai kritikoi ashpër opozitën, duke e akuzuar atë për zhvillimin e një fushate negative në arenën ndërkombëtare dhe përdorimin e protestave të dhunshme në Tiranë, të cilat sipas tij synonin të dëmtonin imazhin e vendit dhe të bllokonin procesin e integrimit. Në kundërpërgjigje, Rama u shpreh se zhvillimet në Bruksel kanë dëshmuar se rruga e vendit drejt Bashkimit Europian mbetet e pandalshme.