Kombëtarja shqiptare e futbollit zbret sot në fushë për miqësoren kundër Izraelit, takim që shënon debutimin e trajnerit italian Rolando Maran në stolin kuqezi. Ndeshja, e cila luhet në stadiumin Air Albania në orën 20:00, vjen pas largimit të Sylvinhos, me teknikun Maran që ka pasur në dispozicion vetëm dy seanca stërvitore.
Historiku i përballjeve favorizon Izraelin, i cili ka regjistruar katër fitore, ndërsa Shqipëria ka fituar dy herë. Ndeshja e fundit mes tyre daton më 24 shtator 2022, ku izraelitët triumfuan me rezultatin 2-1. Për këtë takim, trajneri Maran pritet të aplikojë skemën 4-3-1-2, duke synuar një qasje më sulmuese.
Në aspektin e organikës, Ardian Ismajli është larguar nga grumbullimi për shkak dëmtimi, ndërsa Myrto Uzuni është në dyshim për shkak të temperaturës së lartë. Arbitër kryesor i takimit do të jetë malazezi Milos Savovic.
Ndërkohë, masat e sigurisë janë të pranishme në stadium, ku përfshihen njësitë anti-eksploziv dhe përfaqësues të sigurisë izraelite. Interesimi i tifozëve është i kufizuar, ndërsa Federata Shqiptare e Futbollit ka njoftuar se për këtë ndeshje do të jetë i hapur vetëm kati i parë i stadiumit, pas thirrjeve për bojkot në rrjetet sociale.