Autoriteti Kombëtar i Ushqimit (AKU) ka njoftuar vendosjen e kufizimeve të reja për importet e produkteve me origjinë shtazore nga Brazili, në përputhje me ndryshimet e miratuara në Rregulloren Zbatuese të Komisionit (BE) 2026/1189. Ky vendim vjen pas heqjes së Brazilit nga lista e vendeve të treta të autorizuara për eksport drejt Bashkimit Evropian për kategori të caktuara të kafshëve dhe produkteve të destinuara për konsum njerëzor.
Në zbatim të këtyre ndryshimeve, importimi i mishit të shpendëve dhe të gjedhit nga ky vend do të kushtëzohet nga miratimi paraprak i zonave dhe stabilimenteve të prodhimit nga ana e Bashkimit Evropian. Sipas njoftimit zyrtar, kufizimet në Shqipëri nisin zbatimin më datë 3 shtator 2026. Kjo masë pritet të ndikojë në tregun vendas, duke qenë se Brazili është furnizuesi kryesor për industrinë e përpunimit të mishit.
Megjithatë, autoritetet kanë saktësuar se do të ketë një periudhë tranzitore për dërgesat e nisura. Ngarkesat e mishit të shpendëve dhe të gjedhit, për të cilat certifikata shëndetësore veterinare është nënshkruar ose lëshuar përpara datës 3 shtator 2026, do të pranohen në pikat e kontrollit kufitar, pavarësisht nëse mbërrijnë në Shqipëri pas kësaj date. Ky sqarim bazohet në vendimmarrjen e marrë në Bruksel më 28 maj 2026, gjatë një takimi mes përfaqësuesve të UECBV (Bashkimi Evropian i Tregtisë së Blegtorisë dhe Mishit) dhe DG SANTE.
Përditësime
Autoriteti Kombëtar i Ushqimit përcaktoi bazën ligjore për këtë masë kufizuese, duke iu referuar Rregullores Zbatuese të Komisionit (BE) 2026/1189, e cila ndryshon Rregulloren 2021/405. Për zbatimin e këtij vendimi në tregun vendas, institucioni po ndjek gjithashtu kriteret e përcaktuara në Urdhrin e Ministrit nr. 294, datë 13.06.2006, lidhur me kushtëzimin e importeve nga Brazili.