Në vitin 2024, Shqipëria gjeneroi 322 kilogramë mbeturina urbane për frymë, shumë më pak se mesatarja e Bashkimit Evropian prej 517 kilogramësh, sipas të dhënave të Eurostat-it. Kjo shifër vendoset nën mesataren rajonale të fqinjëve dhe atë evropiane.
Gjatë dekadës 2014-2024, mbetjet urbane për frymë në Shqipëri ranë nga 425 kilogramë në 322 kilogramë, ndërsa mesatarja e BE-së shënoi rritje të lehtë në 517 kilogramë.
Rënia lidhet me disa faktorë. Që nga viti 2020, INSTAT-i ka zbatuar sistemin elektronik të mbledhjes së të dhënave nga bashkitë, duke ndarë mbetjet urbane familjare nga ato industriale apo ndërtimi. Kjo eliminon shifrat e mëparshme të fryra dhe ofron një pasqyrim më të saktë.
Llogaritja për frymë varet nga popullsia rezidente, e cila u tkurr nga mbi 2.8 milionë banorë në 2014 në 2.4 milionë në 2024, veçanërisht në moshën e re konsumatore.
Shqipëria ka konsum individual për frymë rreth 41% të mesatares së BE-së, niveli më i ulët në Evropë. Kjo reflekton mirëqenien ekonomike më të dobët krahasuar me vende si Austria apo Danimarka.
Rënia pasqyron edhe vështirësitë e familjeve përballë rritjes së çmimeve, duke gjeneruar më pak mbetje paketimi e ushqimore.
Pavarësisht prodhimit më të ulët, Shqipëria vuan nivele të larta ndotjeje për shkak të mangësive në grumbullim dhe menaxhim të mbetjeve.