Një zyrtar i Shtëpisë së Bardhë riafirmoi të hënën kundërshtimin e presidentit Donald Trump ndaj aneksimit të Bregut Perëndimor nga Izraeli. Deklarata, e publikuar përmes agjencisë Reuters, u bë në përgjigje të miratimit nga Këshilli i Sigurisë Izraelite të një sërë masash që synojnë forcimin e ndikimit administrativ të Jerusalemit mbi zonat e Bregut Perëndimor, të cilat palestinezët i konsiderojnë pjesë të shtetit të tyre të ardhshëm.
"Presidenti Trump e ka bërë të qartë se nuk e mbështet aneksimin e Bregut Perëndimor nga Izraeli", thuhet në deklaratën e zyrtarit të paidentifikuar. Po ashtu, theksohet se "një Bregu Perëndimor i qëndrueshëm e mban Izraelin të sigurt dhe është në përputhje me qëllimin e kësaj administrate për të arritur paqen në rajon". Kjo përsërit qëndrimin e Uashingtonit në favor të deeskalimit dhe shmangies së veprimeve të njëanshme.
Megjithatë, deklarata nuk i dënoi drejtpërdrejt masat izraelite, të cilat konsiderohen se shkelin Marrëveshjet e Oslos duke zgjeruar përgjegjësitë administrative të Jerusalemit në zonat nën kontrollin e Autoritetit Palestinez.
Deklarata nuk specifikoi nëse Shtetet e Bashkuara i kanë shprehur zyrtarisht shqetësimet qeverisë së kryeministrit izraelit Benjamin Netanyahu lidhur me këto vendime. Uashingtoni ka mbajtur qëndrime të ngjashme në të kaluarën, duke bërë thirrje për ruajtjen e stabilitetit në Bregun Perëndimor si reagim ndaj zgjerimit të vendbanimeve izraelite, pa dënuar drejtpërdrejt veprimet specifike.