Karoline Leavitt, zëdhënësja e Shtëpisë së Bardhë, deklaroi se zgjedhja e parë e presidentit Donald Trump ndaj Iranit është gjithmonë diplomacia, por ai është i gatshëm të përdorë forcën vdekjeprurëse të ushtrisë amerikane nëse kjo është e nevojshme. Kjo u tha gjatë një konference për gazetarët në Uashington.
Leavitt theksoi se vetë presidenti do të marrë vendimin përfundimtar lidhur me kursin e veprimit ndaj Teheranit. Ajo hodhi poshtë raportimet mediatike të 24 orëve të fundit, duke i cilësuar ato të pavërteta. "Kam parë shumë raportime mbresëlënëse [...] që janë krejtësisht të rreme. Kushdo që spekulon në media, i fshehur pas një burimi anonim [...], nuk ka asnjë ide se për çfarë flet", u shpreh ajo.
Deklarata vjen në një kohë kur Shtetet e Bashkuara po grumbullojnë forca të konsiderueshme ushtarake në rajon. Të dyja palët përgatiten për një raund të ri bisedimesh në Gjenevë mbi programin bërthamor iranian. Rezultati i këtyre negociatave pritet të ndikojë nëse presidenti Trump do të urdhërojë goditje ushtarake.
Ndërkohë, sekretari amerikan i Shtetit, Marco Rubio, pritet ta njoftojë drejtuesit kryesorë të Kongresit në Shtëpinë e Bardhë më vonë gjatë së martës, sipas Departamentit Amerikan të Shtetit.
Më 19 shkurt, Trump deklaroi se i kishte dhënë Iranit një afat prej rreth 10 deri në 15 ditësh për të arritur një marrëveshje.