Trajneri i Kombëtares shqiptare të futbollit, Silvinjo, ka përcaktuar listën me 23 lojtarë që do të jenë në protokollin e ndeshjes ndaj Polonisë, të ndarë mes formacionit titullar dhe zëvendësuesve në pankinë.
Nga këta 23 lojtarë, trajneri ka përfshirë vetëm 6 lojtarë ofensivë për repartin e avancuar. Sipas pritshmërive, tre prej tyre do të jenë titullarë, ndërsa tre të tjerë rezervë për zëvendësime në pjesën e dytë. Emrat e mundshëm për avancuar janë Bajrami, Broja, Hoxha, Mehmedi, Muçi dhe Uzuni.
Kjo zgjedhje lë jashtë Asanin dhe Gripshin, të cilët do të ndjekin ndeshjen nga tribuna. Në rast nevoje për ndryshim skeme, trajneri mund të aktivizojë Balliun dhe Mitajin si mesfushorë krahu, duke qenë se prapavija ka alternativa të mjaftueshme.
Për prapavijën, Silvinjo ka grumbulluar 9 mbrojtës, duke siguruar alternativa të shumta në këtë repart, i cili zakonisht preket më pak nga zëvendësimet.