Sindikata e Re e Korporatës Energjetike të Kosovës (KEK) ka reaguar ndaj Qeverisë së Kosovës për mosndarjen e pagës së 13-të punëtorëve të kësaj korporate dhe të disa ndërmarrjeve të tjera.
Në reagim, sindikalistët shkruajnë: “Edhe ne jemi Kosovë! Ne jemi ata që çdo ditë punojmë pa u ndalur, në kushte të rënda, mes rrezikut dhe sakrificës, për të mbajtur dritën ndezur në çdo shtëpi të këtij vendi. Ne nuk jemi thjesht punëtorë – ne jemi shtylla që e mban Kosovën funksionale. Ne kemi familje. Kemi fëmijë në shkolla. Kemi prindër të sëmurë. Kemi halle dhe sfida si çdo qytetar tjetër. Por, pavarësisht gjithçkaje, ne nuk ndalemi kurrë. Punëtorët e KEK-ut janë ndër kontribuuesit më të mëdhenj në buxhetin e shtetit, duke gjeneruar miliona euro çdo vit.”
Sindikata e cilëson këtë si padrejtësi dhe drejton thirrje kryeministrit. Për të shprehur pakënaqësinë, ata paralajmërojnë mbajtjen e një konference për shtyp të enjten para objektit të Qeverisë së Kosovës.