Ministria e Mbrojtjes, nën koordinimin e Agjencisë Kombëtare të Mbrojtjes Civile, njoftoi se situata me zjarret në vend është nën kontroll. Gjatë ditës së sotme u menaxhuan 16 vatra zjarri, ndërsa 5 prej tyre vijojnë të jenë aktive, por janë vënë nën kontroll dhe po punohet për shuarjen përfundimtare.
Operacionet e ndërhyrjes u zhvilluan në zona si Hajdaraj/Synej (Kavajë), Drizë–Peshtan (Fier), Tale (Lezhë), Ulën (Elbasan) dhe Divjakë. Për shuarjen e flakëve u angazhuan 261 forca operacionale, 40 automjete zjarrfikëse, 2 helikopterë, si dhe 30 efektivë me 2 mjete zjarrfikëse të Forcave të Armatosura.
Në këto ndërhyrje morën pjesë forca të Policisë së Shtetit, FNSH-së, Shërbimit Pyjor, si dhe strukturat vendore të emergjencave civile dhe shërbimet shëndetësore të bashkive Fier, Kavajë, Lezhë, Kurbin, Elbasan, Divjakë, Rrogozhinë, Lushnjë, Durrës dhe Kamëz.
Ministria e Mbrojtjes shprehu mirënjohje për personelin e angazhuar dhe ekuipazhet e helikopterëve për kontributin e tyre në mbrojtjen e jetës, pronës dhe mjedisit në kushte të vështira terreni.