Drejtori i Përgjithshëm i Policisë së Shtetit, Drejtues Madhor Skënder Hita, zhvilloi një takim zyrtar me Drejtorin e Shërbimit për Bashkëpunimin Policor Ndërkombëtar të Policisë italiane, Drejtues i Lartë Lorenzo Bucossi, dhe Drejtorin e Shërbimit Qendror Operativ të Policisë italiane, Drejtues i Lartë Marco Cali.
Gjatë bisedimeve, palët vlerësuan nivelin e lartë të bashkëpunimit operacional ndërmjet Policisë së Shtetit dhe autoriteteve italiane. Në fokus të takimit ishin rezultatet konkrete në luftën kundër krimit të organizuar, trafikimit të narkotikëve, pastrimit të produkteve të veprës penale dhe kapjes së personave në kërkim ndërkombëtar.
Një vëmendje e veçantë iu kushtua skuadrave të përbashkëta hetimore, ku Shqipëria mban numrin më të madh të tyre në bashkëpunim me Italinë, çka u cilësua si dëshmi e besimit reciprok dhe efektivitetit të lartë. Po ashtu, u diskutua mbi suksesin e monitorimit ajror në goditjen e kultivimit të bimëve narkotike, një model i vlerësuar gjerësisht nga partnerët ndërkombëtarë.
Drejtori Hita shprehu mirënjohjen për mbështetjen e vazhdueshme italiane në ngritjen e kapaciteteve profesionale të Policisë së Shtetit dhe Akademisë së Sigurisë. Ndihma është konkretizuar përmes përdorimit të literaturës profesionale dhe shkëmbimit të praktikave më të mira në edukimin policor. Palët riafirmuan angazhimin për të forcuar partneritetin strategjik dhe për të rritur shkëmbimin e informacionit në përballimin e sfidave të sigurisë ndërkombëtare.