Drejtues Madhor Skënder Hita, Drejtor i Përgjithshëm i Policisë së Shtetit, zhvilloi më 7 prill 2026 takimin e parë me drejtuesit e Drejtorisë Vendore të Policisë Tiranë, shefat e komisariateve dhe sektorëve në varësi të saj.
Qëllimi kryesor ishte marrja e masave për rritjen e parametrave të rendit dhe sigurisë së jetës dhe pronës së qytetarëve në kryeqytet.
Hita kërkoi më shumë angazhim, përkushtim dhe profesionalizëm për parandalimin, evidentimin dhe goditjen e krimit, si:
- shitja e lëndëve narkotike dhe kultivimi i kanabisit në terrene të hapura ose ambiente të mbyllura;
- armëmbajtja pa leje;
- krime ekonomike;
- lojëra të fatit dhe call center-e të paligjshme;
- trafiqe;
- krime mjedisore, veçanërisht lirimi i hapësirave publike, ndërtimet pa leje dhe ndotja e mjedisit.
Ai theksoi rritjen e prezencës policore dhe kapaciteteve profesionale në rendin dhe sigurinë në tërësi, sigurinë në shkolla, kibernetike dhe rrugore, për parandalim dhe përmirësim të parametrave të sigurisë.
Hita u ndal te adresimi dhe ndjekja në dinamikë e shqetësimeve dhe denoncimeve të qytetarëve, duke nënvizuar se ligji dhe qytetarët janë parësorë për Policinë e Shtetit. Kërkoi reagim të menjëhershëm, angazhim dhe profesionalizëm, pasi besimi i qytetarëve fitohet me punë dhe sjellje korrekte të punonjësve policorë.
Gjithashtu, u kërkoi drejtuesve të mbështesin dhe motivojnë punonjësit në terren, duke vlerësuar përkushtimin e tyre të përditshëm.