Përfaqësuesja e Lartë e Bashkimit Europian për Punët e Jashtme dhe Politikën e Sigurisë, Kaja Kallas, ka njoftuar propozimin për emërimin e Sofia Moreira de Sousa në krye të Delegacionit të Bashkimit Europian në Tiranë. Aktualisht, diplomatja portugeze mban detyrën e Shefes së Përfaqësisë së Komisionit Europian në Portugali.
Sofia Moreira de Sousa ka një karrierë të gjatë diplomatike, ku spikat detyra e mëparshme si ambasadore e Bashkimit Europian në Kepin e Gjelbër. Ajo pritet të zëvendësojë ambasadorin aktual, Silvio Gonzato, i cili parashikohet të përmbyllë misionin e tij në Shqipëri në fund të kësaj vere.
Ky propozim është pjesë e një lëvizjeje më të gjerë diplomatike që përfshin 33 ambasadorë dhe 7 zëvendësshefa të delegacioneve të BE-së në mbarë botën. Këto delegacione shërbejnë si përfaqësi të Bashkimit Europian, duke njoftuar, zbatuar dhe promovuar politikat e jashtme dhe të sigurisë në vendet përkatëse. Formalizimi përfundimtar i këtyre emërimeve do të ndodhë pas përmbushjes së kritereve administrative të rotacionit për vitin 2026 dhe pas marrjes së miratimit zyrtar nga autoritetet shqiptare.
Përditësime
Më 8 qershor, Shërbimi Evropian për Veprim të Jashtëm (EEAS) konfirmoi zyrtarisht propozimin e Sofia Moreira de Sousa për postin e ambasadores së BE-së. Përveç këtij emërimi, EEAS njoftoi edhe zgjedhjen e 2 drejtuesve të rinj në selinë e saj në Bruksel. Aktualisht, rrjeti diplomatik i Bashkimit Evropian përfshin 145 delegacione në mbarë botën.