Peter Sorensen, i dërguari i Bashkimit Evropian për dialogun Kosovë-Serbi, zhvilloi një takim në Departamentin e Shtetit të Shteteve të Bashkuara me zyrtarin e lartë të Byrosë për Çështje Evropiane dhe Euroaziatike, Brendan Hanrahan. Takimi u mbajt gjatë ditës së djeshme dhe u njoftua nga vetë Sorenseni në platformën X.
Sorensen shkroi se takimi ishte i shkëlqyer dhe se palët diskutuan për dialogun Kosovë-Serbi, shqyrtuan arritjet e fundit dhe siguruan harmonizimin e veprimeve për hapat e ardhshëm. Departamenti i Shtetit njoftoi për takimin, por nuk dha detaje të tjera.
Ky takim pason atë të Sorensenit me kryeministrin e Kosovës, Albin Kurti, në Prishtinë më 14 mars. Gjatë asaj vizite, Qeveria e Kosovës vendosi të ofrojë leje të përkohshme qëndrimi për 12 muaj për pjesëtarët e komunitetit serb që nuk posedojnë dokumente kosovare, si dhe të njohë letërnjoftimet e lëshuara nga organet serbe. Këto lehtësira lidhen me Ligjin për të huajt dhe Ligjin për automjetet, të cilët hynë plotësisht në fuqi më 15 mars.
Ligjet filluan zbatim të pjesshëm më 15 janar përmes një fushate informative për procedurat. Ato prekin kryesisht anëtarët e komunitetit serb që jetojnë, punojnë ose studiojnë në Kosovë pa dokumente kosovare, si në rastin e Universitetit të Mitrovicës së Veriut, i cili funksionon sipas sistemit serb.
Vendimi për lehtësira u mirëprit nga Serbia, Bashkimi Evropian, Shtetet e Bashkuara dhe Mbretëria e Bashkuar. Ambasada amerikane në Prishtinë theksoi se mirëpret marrëveshjen mes Kosovës dhe BE-së, por çdo ndryshim që prek komunitetin serb duhet të bëhet në konsultim me të. "E përgëzojmë angazhimin e palëve për të arritur zgjidhje të pranueshme për të dyja palët", u shpreh një zëdhënës i ambasadës më 17 mars për Radion Evropa e Lirë.