Gjykata Themelore në Ferizaj mban sot, ora 09:00, seancën e shqyrtimit fillestar për vrasjen e policit Muhamed Lika. Seanca zhvillohet në katin e parë, sallën numër një, nën drejtimin e gjyqtarit Ilir Bytyqi dhe është e hapur për publikun.
Të pandehurit H.B., R.M., V.Ç., E.L., Sh.K. akuzohen për veprën penale të vrasjes së rëndë, ndërsa D.G. për dhënien e ndihmës kryerësve pas veprës penale. Sipas aktakuzës, më 1 prill 2025, rreth orës 23:00, në Kaçanik, afër vendit ku ka jetuar viktima, të pandehurit në bashkëkryerje me një të mitur kanë privuar nga jeta rreshterin policor Muhamed Lika me armë zjarri. Si pasojë e të shtënave, viktima ka ndërruar jetë nga plagët, ndërsa të pandehurit janë larguar nga vendi i ngjarjes.
Prokurori i çështjes ka propozuar shpalljen e tyre fajtorë pas administrimit të provave dhe vazhdimin e masës së paraburgimit deri në përfundim të gjyqit. Gjykata Themelore në Ferizaj ka njoftuar seancën më 14 janar për publikun.