Më 8 gusht 2020, në aplikacionin e koduar Sky ECC, qarkulloi një fotografi e një personi të shtrirë përtokë, i mbuluar pjesërisht nga bimësia. Mesazhi shoqërues shkruante në spanjisht: “Një mashtrues më pak, vëlla” dhe “Janë tashmë 4 nga e njëjta familje, vëlla, dhe derisa t’i vras të gjithë burrat, nuk do të ndalem”.
Hetimet e Prokurorisë së Posaçme Kundër Korrupsionit dhe Krimit të Organizuar (SPAK), pesë vite më vonë, përcaktuan se dërguesi ishte një burrë nga veriu i Shqipërisë, në hasmëri me një familje tjetër. Prokurorët vlerësojnë se personi në foto ishte një 21-vjeçar i zhdukur një ditë para mesazhit. Për muaj me radhë, ai rezultonte i humbur.
Në dhjetor 2020, qeni i një fermeri gjeti një kafkë njeriu në një ullishte mbi një gurore të braktisur pranë fshatit Shpërdhet në Mamurras. Policia gjeti eshtra të tjera, një palë mbathje të bardha bokser dhe pantallona të shkurtra sportive të zeza me mbishkrimin Nike.
Ekspertët mjeko-ligjorë konstatuan se mbetjet i përkisnin një të riu midis 20 dhe 30 vjeç, vrarë me armë zjarri. Testi i ADN-së konfirmoi identitetin si Klevis Lleshi, i cili kishte humbur kontaktet me familjen prej muajsh.
Deklarimet e familjarëve të viktimës dhe të dhënat e policisë ngritën dyshime për motive gjakmarrjeje. Hetimet vijojnë në kuadër të operacionit policor.