Prokuroria e Posaçme Kundër Korrupsionit dhe Krimit të Organizuar (SPAK) ka paraqitur konkluzionet përfundimtare në Gjykatën e Posaçme (GJKKO) për një fraksion të dosjes voluminoze "Revanshi". Në total, organi i akuzës ka kërkuar 56 vite burgim për pesë të pandehurit, të cilët akuzohen për vepra penale si "grup i strukturuar kriminal", "kultivim i bimëve narkotike", "armëmbajtje pa leje" dhe "sigurim i kushteve për të kryer vrasje".
Nëpërmjet gjykimit të shkurtuar, dënimet përfundimtare të kërkuara për të pandehurit janë:
• Armando Ndreca: 10 vite burg (nga 15 vite të kërkuara fillimisht).
• Deivis Bajramaj: 8 vite burg (nga 12 vite të kërkuara fillimisht).
• Adrian Pikli (ish-efektiv i RENEA-s): 7 vite burg (nga 10 vite e 6 muaj të kërkuara fillimisht).
• Elvis Ndreca: 6 vite burg (nga 9 vite të kërkuara fillimisht).
• Edison Muçeku: 6 vite burg (nga 9 vite të kërkuara fillimisht).
Sipas dosjes hetimore, ngjarjet për të cilat akuzohen të pandehurit lidhen me periudhën 2020-2021. Armando Ndreca akuzohet për organizimin dhe financimin e kultivimit të 243 kilogramëve kanabis në zonën e Lezhës. Ndërkaq, Adrian Pikli dhe Deivis Bajramaj dyshohen për përfshirje në tregtinë e paligjshme të armëve.
Prokuroria pretendon gjithashtu se janë siguruar mjete për kryerjen e atentateve ndaj personave të ndryshëm. Elvis Ndreca dyshohet për sigurimin e kushteve për vrasjen e Durim Bamit, ndërsa Edison Muçeku dyshohet për vrasjen e Hamza Terziut. Dosja "Revanshi" është ndarë në disa fraksione për shkak të kompleksitetit të episodeve kriminale. Për të pandehurin Albert Zaja, i cili lidhet me të njëjtat episode, SPAK ka veçuar procedimin në një dosje të mëvete.
Përditësime
Prokuroria e Posaçme (SPAK) ka zbardhur detaje të reja nga dosja 'Revanshi', duke identifikuar Elvis Ndrecën, kushëri i ish-deputetit socialist Eduard Ndreca, si pjesëtar të grupit kriminal. Sipas akuzës, të pandehurit kanë përgatitur atentatin ndaj Durim Bamit dhe Ervin Kodrës gjatë periudhës maj-gusht 2020, ndërsa ngjarja e ndodhur më 4 nëntor 2020 te Ura e Tapizës mbeti e parealizuar. Në kuadër të këtij procedimi, SPAK ka kërkuar gjithsej 56 vite burg për pesë të pandehurit e dosjes.