Kreu i SPAK, Klodian Braho, zhvilloi takimin e tij të parë me gazetarët, ku prezantoi bilancin e aktivitetit të institucionit për periudhën 1 janar – 15 korrik 2026. Gjatë kësaj konference, ai iu përgjigj interesimit të medias lidhur me kallëzimin penal ndaj deputetit Agron Shehaj.
Sipas informacioneve, çështja ka të bëjë me marrëveshjen sekrete të Shqipërisë me SHBA-të. Kreu i Kuvendit kishte udhëzuar deputetët që ky dokument mund të lexohej vetëm brenda sallës së quajtur “Bogdani”, për shkak të natyrës së tij të klasifikuar. Megjithatë, sipas pretendimeve, Agron Shehaj dyshohet se e mori dokumentin dhe u largua me vrap jashtë ambienteve të parlamentit.
Në përgjigje të pyetjes së gazetares Alketa Shaba mbi statusin e këtij rasti, Klodian Braho deklaroi:
“Ka një kallëzim penal që ka mbërritur dhe është në proces verifikimi. Prokurori po verifikon pretendimet dhe do të dalë me një vendim.”
Aktualisht, institucioni po kryen të gjitha verifikimet e nevojshme për të përcaktuar hapat e mëtejshëm ligjorë në lidhje me këtë rast, të cilin palët e përfshira e kanë cilësuar si një ngjarje të paprecedentë.