Prokuroria e Posaçme kundër Korrupsionit dhe Krimit të Organizuar ka paraqitur konkluzionet përfundimtare për tre të pandehurit e dosjes së veçuar nga procesi gjyqësor ndaj Ilir Metës dhe Monika Kryemadhit. Gjatë seancës, trupi gjykues i GJKKO-së rrëzoi kërkesën e mbrojtjes së Fatime Kryemadhit për t'u tërhequr nga gjykimi i shkurtuar dhe për t'u bashkuar me dosjen kryesore.
Pretencat e kërkuara nga prokuroria për të pandehurit janë si vijon:
- Fatime Kryemadhi: Akuzohet për "pastrim parash". Prokuroria kërkoi 7 vite e 6 muaj burg, që pas gjykimit të shkurtuar ulet në 5 vite burg, me kërkesën për pezullim dhe vendosje në shërbim prove për 5 vite. Gjithashtu, është kërkuar konfiskimi i një vile në pronësi të saj në zonën e Kodrës së Diellit, e konsideruar si pasuri ekuivalente me shumën e pastruar.
- Ema Çoku: Akuzohet për "pastrim parash". Prokuroria kërkoi 7 vite burg, që me gjykim të shkurtuar zbret në 4 vite e 8 muaj burg, me kërkesën për pezullim dhe vendosje në shërbim prove për 5 vite.
- Pirro Xhixho: I akuzuar për "korrupsion pasiv të funksionarëve të lartë shtetërorë", prokuroria kërkoi dënimin me 4 vite e 6 muaj burg, që pas gjykimit të shkurtuar ulet në 3 vite burg. Për shkak të moshës dhe rrethanave të tjera, prokuroria propozoi pezullimin e ekzekutimit të dënimit dhe vendosjen e tij në shërbim prove për 4 vite.
Përditësime
Prokurori i SPAK, Sotir Kllapi, ka paraqitur sot pretencën për Fatime Kryemadhin, Ema Çokun dhe Pirro Xhixhon, duke kërkuar për ta një dënim total prej 19 vitesh burg. Për shkak të moshës së të pandehurve, akuza ka propozuar pezullimin e ekzekutimit të dënimit me burgim dhe zëvendësimin e tij me shërbim prove. Ky proces është pjesë e hetimeve mbi aferën CEZ-DIA, lobimin e LSI-së dhe verifikimet pasurore të lidhura me këto çështje.