SPAK ka sekuestruar pasuritë e Mirlinda Karçanaj, ish-drejtoreshës së AKSHI-t, duke përfshirë dy banesa në Tiranë, një banesë në Qerret, llogari bankare dhe një automjet tip Tiguan.
Kjo ndodh një ditë pasi SPAK bëri të ditur sekuestrimin e këtyre aseteve. Deputeti i Partisë Demokratike, Belind Këlliçi, reagoi në rrjetet sociale, duke rikujtuar deklaratën e kryeministrit Edi Rama. Rama kishte thënë se Karçanaj jeton me qira dhe nuk ka shtëpi apo makinë, duke dalë garant për ndershmërinë e saj.
Këlliçi thekson se gjetjet e SPAK-ut bien ndesh me deklaratat e Ramës. Ai përmend 40 milionë euro në total, përfshirë personat Agasin, Beqirin dhe Hoxhën, për aktivitet kriminal të lidhur me AKSH-në, të cilën e quan "kopsht personal" të Ramës dhe familjes së tij.
Sipas SPAK-ut, rryshfetet merreshin në euro me prerje nga 100 në 500, të futura në kuti vere. Këlliçi kërkon dorëheqjen e Ramës, duke thënë se ai duhet të mbajë përgjegjësi.