Në vijim të hetimeve që po drejtohen nga kryeprokurori i SPAK, Klodian Braho, Byroja Kombëtare e Hetimit (BKH) ka ndërmarrë kontrolle dhe ka sekuestruar pajisje telefonike. Veprimet procedurale janë ndërmarrë në zbatim të vendimeve të Gjykatës së Posaçme, e cila ka miratuar kërkesat e prokurorisë lidhur me çështjen e nisur pas audio-përgjimit të denoncuar nga Arben Ahmetaj.
Sipas të dhënave të raportuara nga gazetarja Anila Hoxha, janë sekuestruar telefonat e personave të mëposhtëm:
• Aleks Marku, sekretar i përgjithshëm në Ministrinë e Mbrojtjes
• Ron Yeffet, biznesmen
• Arjeta Puca, biznesmene
• Ardi Veliu, kreu i KAYO-s
Përveç pajisjeve telefonike, hetuesit kanë administruar edhe dokumente të ndryshme të sekuestruara gjatë kontrolleve në terren. Hetimet vijojnë për verifikimin e provave të mbledhura dhe zbardhjen e plotë të rrethanave të kësaj çështjeje. Informacionet mbi këto veprime hetimore bazohen në burime jozyrtare.