Një valë masive emigracioni ka përfshirë enklavën spanjolle të Ceutës në Afrikën e Veriut, ku gjatë ditëve të fundit u regjistrua hyrja e rreth 50,000 deri në 60,000 personave. Shumica e migrantëve mbërritën përmes rrugës detare, duke notuar nga qyteti maroken i Fnideq drejt plazhit Tarajal.
Sipas njoftimeve zyrtare nga Ministria e Brendshme e Spanjës, numri i personave që kanë humbur jetën në ujërat spanjolle ka arritur në 67. Viktimat janë shkaktuar nga mbytjet në det dhe nga rrëmujat gjatë përpjekjeve për të kapërcyer barrierat kufitare. Megjithatë, media Mapo raporton se trupave spanjollë u shtohen edhe 17 viktima të gjetura nga autoritetet marokene, duke e çuar numrin total të viktimave në 84.
Ministri i Brendshëm spanjoll, Fernando Grande-Marlaska, deklaroi se situata në kufi është vënë nën kontroll brenda 24 orësh falë bashkëpunimit me Marokun, të cilin e cilësoi si partner të besueshëm. Sipas autoriteteve, pjesa dërmuese e personave që hynë në territorin spanjoll janë rikthyer tashmë në Marok nën përcjelljen e forcave të sigurisë.
Si masë kundër këtij fluksi, Spanja ka filluar vendosjen e një sistemi mbrojtës të fryrë me gjatësi 500 metra në zonën e valëthyeses Tarajal. Struktura, e cila përfshin elementë lundrues të ankoruar, synon të krijojë një korridor për patrullimin e përhershëm nga mjetet e Gardës Civile. Kryeministri Pedro Sanchez e ka cilësuar incidentin si një sulm ndaj integritetit territorial të vendit, duke ia atribuar krizën keqinterpretimit të një vendimi të Gjykatës Supreme të Spanjës nga ana e rrjeteve të trafikimit.
Përditësime
Autoritetet spanjolle konfirmuan se asnjë nga emigrantët e mbërritur në Ceuta nuk është transferuar në territorin kontinental. Brenda 48 orëve, mbi 48,000 persona janë kthyer në Marok. Për të forcuar kufirin, ekipet teknike instaluan një barrierë të re lundruese, e cila ngrihet 30-70 cm mbi nivelin e ujit dhe zhytet 1 metër në thellësi.