Në lagjen Fatih të Stambollit, një zonë shumë e frekuentuar nga turistët, ka ndodhur një incident me armë zjarri që u ka marrë jetën 3 personave, ndërsa një tjetër ka mbetur i plagosur. Të shtënat kanë ndodhur në një dyqan që ndodhet brenda kompleksit tregtar Sofcu Han, pranë Pazarit të Madh.
Sipas njoftimeve nga agjencia shtetërore turke Anadolu, ngjarja e rëndë erdhi pas një debati që u zhvillua mes pronarit të dyqanit dhe një klienti. Megjithëse ende nuk ka një konfirmim zyrtar mbi natyrën e saktë të biznesit, raportimet e mediave bëjnë me dije se konflikti dyshohet të ketë ndodhur në një zyrë këmbimi valutor.
Policia turke ka ndërhyrë menjëherë në vendngjarje dhe ka prangosur një të dyshuar. Agjencia private e lajmeve DHA ka publikuar fotografi ku shihet transportimi i një personi me barelë drejt një ambulance. Autoritetet kompetente kanë nisur hetimet për të sqaruar rrethanat dhe motivin e plotë të këtij incidenti. Sipas raportimeve, bilanci fillestar i viktimave ishte më i ulët, por më pas autoritetet konfirmuan shifrën përfundimtare prej tre viktimash.