Keir Starmer, kryeministri i Mbretërisë së Bashkuar, deklaroi në një konferencë për shtyp se vendi i tij po punon me aleatët evropianë për një plan të përbashkët që synon rihapjen e Ngushticës së Hormuzit, një nga korridoret më të rëndësishëm për transportin global të naftës.
Ai theksoi se Londra ka ndërmarrë masa emergjente së bashku me vende të tjera për të stabilizuar tregun e energjisë. “Ne kemi vepruar tashmë së bashku me vende të tjera për të liruar rezerva emergjente të naftës në një nivel krejtësisht të paprecedentë. Por në fund të fundit, duhet të rihapim Ngushticën e Hormuzit për të siguruar stabilitet në treg”, tha Starmer.
Kreu i qeverisë britanike shtoi se rikthimi i lirisë së lundrimit në këtë zonë është një proces kompleks që kërkon koordinim ndërkombëtar. “Ky nuk është një proces i thjeshtë. Prandaj po punojmë me të gjithë aleatët tanë, përfshirë partnerët europianë, për të ndërtuar një plan kolektiv të zbatueshëm që mund të rikthejë sa më shpejt lirinë e lundrimit në rajon dhe të zbusë ndikimet ekonomike”, u shpreh ai.
Starmer nuk përmendi në mënyrë specifike përfshirjen e SHBA-ve, por theksoi se operacioni amerikan ka dobësuar masivisht aftësinë ushtarake të Iranit. Pas konfliktit, sipas tij, nevojitet një marrëveshje negociuar që kufizon rindërtimin e programit bërthamor iranian dhe siguron transportin detar ndërkombëtar.
Ai vuri në dukje se Mbretëria e Bashkuar nuk do të përfshihet në një luftë më të gjerë, duke prioritizuar mbrojtjen e popullatës së saj në rajon.