Transferimi i Arbër Hoxhës nga Dinamo Zagreb drejt skuadrës së Al Wahda në Emiratet e Bashkuara Arabe vijon të mbetet i pazgjidhur. Ndonëse klubet kanë arritur një marrëveshje për kartonin e lojtarit, e cila parashikon një pagesë prej 2.5 milionë eurosh, përfitime shtesë dhe përqindje nga shitjet e ardhshme, pengesa kryesore mbetet akordi individual mes futbollistit dhe klubit arab.
Sipas raportimeve, procesi i transferimit nuk është finalizuar për shkak të mungesës së një marrëveshjeje përfundimtare për kushtet personale. 27-vjeçari, i cili është pjesë e organikës së Dinamos së Zagrebit, u aktivizua gjatë fundjavës së kaluar në fitoren 3-2 të skuadrës së tij kundër Lokomotivës, duke luajtur për 25 minutat e fundit.
E ardhmja e lojtarit mbetet e hapur deri në mbylljen e afatit të transferimeve në Emiratet e Bashkuara Arabe, që është përcaktuar për datën 28 shtator. Kontrata aktuale e Hoxhës me kampionët kroatë është e vlefshme deri në verën e vitit 2029.