Qeveria e Suedisë ka paraqitur një projektligj për të ulur moshën e përgjegjësisë penale nga 15 në 13 vjeç në rastet e krimeve të rënda. Propozimi vjen përballë rritjes së numrit të fëmijëve të rekrutuar nga rrjetet kriminale për të kryer vepra të dhunshme pa pasoja ligjore serioze.
Ministri i Drejtësisë, Gunnar Strömmer, e cilësoi situatën si “emergjente” dhe theksoi se ndalimi i shfrytëzimit të fëmijëve është detyrë thelbësore. Ai sqaroi se ulja nuk është e përgjithshme, por zbatohet vetëm për krime si vrasja, tentativa e vrasjes, shpërthimet e rënda, veprat e rënda me armë dhe përdhunimet e rënda. Në raste të caktuara, të miturit mund të përballen me dënime burgimi.
Të dhënat e Këshillit Kombëtar Suedez për Parandalimin e Krimit tregojnë se numri i veprave penale të regjistruara me të dyshuar nën 15 vjeç është dyfishuar gjatë dekadës së fundit. Qeveria, në pushtet që nga viti 2022, premtoi luftë kundër krimit të organizuar. Një hetim i vitit të kaluar rekomandoi uljen në 14 vjeç, ndërsa kryeministri Ulf Kristersson konfirmoi në shtator se fëmijët shfrytëzohen nga bandat për krime të rënda dhe masat synojnë mbrojtjen e tyre si dhe të viktimave të mundshme.
Kundërshtimet
Disa autoritete, si policia, prokurorët dhe shërbimi korrektues, kundërshtojnë propozimin. Ata paralajmërojnë se mund të nxisë përfshirjen e fëmijëve edhe më të vegjël në krime dhe se sistemi penal nuk është i përgatitur për të mitur kaq të rinj. Kritikët propozojnë trajtim me programe rehabilitimi në vend të ndëshkimeve penale dhe dyshojnë në motivet politike, në prag të zgjedhjeve të shtatorit.
Nëse miratohet, ligji mund të hyjë në fuqi këtë verë, pas shqyrtimit nga Këshilli suedez për Legjislacionin dhe votimit në parlament.
Përditësime
52 persona nën 15 vjeç u përfshenë në procedura gjyqësore për vrasje dhe planifikim vrasjesh vitin e kaluar, sipas autoriteteve suedeze.
Dënimet e reja parashikojnë 1-2 vjet burg për 13-vjeçarët dhe 3-4 vjet për 14-vjeçarët, me alternativa si mbikëqyrja sociale.
Masa e uljes së moshës së përgjegjësisë penale në 13 vjeç është e përkohshme për 5 vjet, me rivlerësim më pas.
Hyn në fuqi në fillim të muajit korrik.
Gjithashtu priten masa të reja më të rrehta për shkelësit nën 18 vjeç.
Tetë institucione korrektuese krijojnë njësi të posaçme për të rinjtë nën 15 vjeç, me tre funksionale deri më 1 korrik, njoftoi qeveria suedezë.
Në këto njësi, të miturit ndahen nga të rriturit, kalojnë 11 orë në qeli gjatë natës dhe kanë qasje në arsim, aktivitete rekreative dhe shërbime shëndetësore.
Qendrat edukative të mëparshme u shndërruan në vende rekrutimi për krimin. Megjithëse krimet e përgjithshme nga të rinjtë ranë, rastet e rënda me armë ose eksplozivë nga të rinj nën 15 vjeç u rritën.
Organizatat për të drejtat e fëmijëve dhe administrata e burgjeve kundërshtojnë mungesën e trajnimit për stafin.