Sportistët shqiptarë po shënojnë rezultate të shkëlqyera në Lojërat Mesdhetare që po mbahen në Taranto të Italisë. Në disiplinën e mundjes, Ardit Zeneli i ka dhuruar Shqipërisë medaljen e parë, atë të bronztë, në stilin greko-romak për kategorinë deri në 67 kg. Ai arriti të mposhtte mundësin grek Stavros Ntounias me rezultatin 9-8 pas një përballjeje tepër të luftuar.
Në stilin e lirë, Zelimkhan Abakarov dhe Islam Dudaev kanë siguruar kualifikimin në finalet e kategorive të tyre, duke garantuar për Shqipërinë të paktën medaljen e argjendtë. Zelimkhan Abakarov (65 kg) triumfoi ndaj egjiptianit Shehabeldin Eman me 3-0 dhe ndaj sirianit Ahmad Dirki me 6-2, duke siguruar dyluftimin për medaljen e artë kundër mundësit turk Duman.
Nga ana tjetër, Islam Dudaev (74 kg) zhvilloi një paraqitje dominuese, duke mposhtur kosovarin Egzon Xhoni (11-2), grekun Georgios Ioakeimidis (10-0) dhe spanjollin Mohammad Mottaghinia (3-1). Në finale, ai do të përballet për titullin kampion me mundësin nga Maqedonia e Veriut, Fati Vejseli.
Ndërkohë, në sportin e boksit për peshën 80 kg, sportisti Amar Koci u eliminua nga turneu pas humbjes 5-0 përballë grekut Michail Tsamalidis. Përfaqësimi i Shqipërisë në Taranto 2026 vazhdon edhe me garat e tjera, ku përfshihet edhe pjesëmarrja e Albinës Drazhi në stilin e lirë, kategoria deri në 68 kg.