Autoritetet ruse raportuan një sulm të konsideruar si të paprecedentë, ndërsa qyteti i Shën Petersburgut po priste ditën e fundit të Forumit Ekonomik Ndërkombëtar. Sipas guvernatorit të rajonit të Leningradit, Aleksandr Drozdenko, mbrojtja kundërajrore ka rrëzuar mbi 140 dronë ukrainas, duke shkaktuar zjarr në një objekt ushtarak dhe dëme materiale të kufizuara.
Guvernatori i Shën Petersburgut, Alexander Beglov, u kërkoi për herë të parë banorëve të qëndrojnë brenda shtëpive të tyre, ndërsa në disa zona u raportuan masa evakuimi. Presidenti ukrainas, Volodymyr Zelensky, konfirmoi goditjen e arsenaleve ushtarake dhe bazës detare në Kronstadt, qendra kryesore e Flotës Baltike të Rusisë. Sipas zyrtarëve ukrainas, dronët përshkuan rreth 1,000 kilometra për të arritur objektivat, ndërsa një tjetër sulm goditi një depo nafte në rajonin e Krasnodarit.
Ky përshkallëzim ushtarak ndodhi një ditë pas deklaratave të presidentit Vladimir Putin në Forumin Ekonomik, ku ai refuzoi mundësinë e një takimi të drejtpërdrejtë me Zelenskyn. Sipas Moskës, një armëpushim do t'i shërbente Ukrainës për t'u rigrupuar ushtarakisht, qëndrim të cilin Kievi e ka kundërshtuar. Komandantë të njësive ukrainase deklaruan për mediat ndërkombëtare se kapacitetet për operacione me rreze të gjatë janë rritur ndjeshëm, duke lehtësuar goditjen e objektivave strategjikë brenda territorit rus.