Ngjarja ndodhi rreth orës 18:00 në kompleksin Seattle Center, ku po zhvillohej festivali vjetor i ushqimit Bite of Seattle. Ky aktivitet tre-ditor, i cili tërheq qindra mijëra vizitorë, u kthye në skenë tragjedie kur persona të armatosur hapën zjarr pranë shatërvanit, duke shkaktuar panik mes pjesëmarrësve.
Sipas të dhënave të Departamentit të Zjarrfikësve, dy persona u shpallën të vdekur në vendngjarje, ndërsa pesë të tjerë u transportuan në spital me plagë të shkaktuara nga armët e zjarrit. Raportimet e mëvonshme, duke cituar burime spitalore dhe ndërkombëtare, sugjerojnë se numri i viktimave ka shkuar në 3, pasi një i plagosur ka ndërruar jetë pas dërgimit në Qendrën Mjekësore Harborview.
Mes të plagosurve është edhe një fëmijë 2-vjeçar, gjendja e të cilit raportohet e qëndrueshme. Gjithashtu, janë trajtuar tre gra të moshës 39, 40 dhe 56 vjeç, si dhe një burrë 23-vjeçar. Gruaja 56-vjeçare është raportuar në gjendje të rëndë shëndetësore.
Kryebashkiakja e Seattle-it, Katie Wilson, konfirmoi arrestimin e një të dyshuari menjëherë pas sulmit. Disa burime mediatike raportojnë se policia është duke kërkuar një person të dytë, i cili dyshohet se është larguar nga zona e ngjarjes. Autoritetet lokale, përfshirë forcat e sigurisë dhe agjentët e FBI-së, kanë bllokuar zonën dhe kanë pezulluar përkohësisht shërbimin e linjës së Monorail-it.
Sipas Arkivit të Dhunës me Armë (Gun Violence Archive), ky është një nga të paktën 271 incidentet me të shtëna masive të regjistruara në Shtetet e Bashkuara gjatë këtij viti. Hetimet për zbardhjen e motiveve të këtij akti të dhunshëm mbeten në vijim.
Përditësime
Policia konfirmoi se ngjarja gjatë festivalit "Bite of Seattle" ishte një shkëmbim zjarri mes dy personash. Bilanci i viktimave është rënduar në 3 të vdekur dhe 4 të plagosur, nga raportimet e mëparshme për 2 të vdekur dhe 5 të plagosur. Të plagosurit kanë pësuar lëndime në gjymtyrë dhe në bark. Për sigurinë e zonës dhe hetimet në vijim janë angazhuar njësitë speciale SWAT të shtetit të Uashingtonit dhe agjentët e ATF.
Autoritetet e Policisë së Seattle konfirmuan se nuk ka më asnjë rrezik për komunitetin pas incidentit në festivalin Bite of Seattle, ku morën pjesë rreth 350 mijë vizitorë. Hetuesit gjetën dy armë zjarri në vendngjarje, ndërsa të dyshuarin kryesor e përshkruan si një person të ri në moshë. Sipas hetimeve paraprake, përplasja dyshohet se ishte një konflikt i çastit midis dy personave. Guvernatori i Uashingtonit dhe një kongresmene lokale lëshuan deklarata zyrtare duke dënuar ashpër aktin e dhunshëm.