Një ngjarje tragjike është regjistruar mëngjesin e kësaj të marte, më 6 tetor 2026, në një shkollë të mesme në lagjen Başakşehir të Stambollit. Rreth orës 08:35, një nxënëse 15-vjeçare ka sulmuar me thikë disa bashkëmoshatarë, duke shkaktuar plagosjen e tetë nxënësve, një prej të cilëve ka ndërruar jetë si pasojë e plagëve të marra. Lajmi për vdekjen e njërit prej nxënësve është konfirmuar nga ministri turk i Arsimit, Yusuf Tekin. Autorja e dyshuar, e identifikuar me inicialet F.M., e lindur në vitin 2011, është ndaluar menjëherë nga policia pas incidentit.
Sipas hetimeve paraprake, autorja nuk është nxënëse e shkollës ku ndodhi ngjarja, e identifikuar si Shkolla e Mesme Anatoliane Şamil (e njohur edhe si Şehir Şamil İmam Hatip). Ajo ndiqte një shkollë të mesme në Küçükçekmece. Guvernatori i Stambollit, Davut Gul, ka deklaruar se sulmi është kryer në mënyrë të rastësishme dhe pa shënjestruar ndonjë person specifik.
Në lidhje me gjendjen shëndetësore të të lënduarve, ata u dërguan për ndihmë mjekësore në Spitalin e Qytetit Başakşehir Çam dhe Sakura. Ministri turk i Shëndetësisë, Kemal Memişoğlu, bëri me dije se gjendja e të plagosurve mbetet shqetësuese, ndërsa vijon trajtimi për ata që ndodhen ende në spital. Autoritetet lokale kanë nisur një hetim të detajuar gjyqësor dhe administrativ për të zbardhur rrethanat e plota të këtij sulmi.
Incidenti ka shkaktuar tronditje të thellë në institucionin arsimor dhe në opinionin publik. Ndërkohë, po punohet për të kuptuar motivet që çuan nxënësen 15-vjeçare drejt këtij akti të dhunshëm, ndërsa zyrtarët qeveritarë po monitorojnë nga afër zhvillimet në lidhje me hetimet e nisura.
Përditësime
Një nga nxënësit e plagosur në sulmin me thikë në Stamboll ka ndërruar jetë, konfirmoi ministri i Arsimit Yusuf Tekin.
Guvernatori Davut Gul konfirmoi se autorja nuk është nxënëse e shkollës ku ndodhi sulmi dhe se veproi rastësisht, ndërsa pjesa më e madhe e të plagosurve janë jashtë rrezikut.