Një seri sulmesh të gjera ruse me mjete ajrore pa pilot dhe raketa goditën disa qytete të Ukrainës gjatë natës së së hënës. Sipas presidentit ukrainas Volodymyr Zelensky, numri i viktimave ka arritur në 11 persona, ndërsa 53 të tjerë janë plagosur.
Në kryeqytetin Kiev, sulmi shkaktoi dëme të rënda në Katedralen e Fjetjes së Hyjlindëses, monument i shekullit XI. Kryebashkiaku i Kievit, Vitali Klitschko, konfirmoi se në kryeqytet humbën jetën katër persona dhe u plagosën 23 të tjerë, ndërsa mbi 140 mijë banorë mbetën pa energji elektrike. Në qytetin verilindor të Kharkivit, guvernatori rajonal Oleh Synegubov njoftoi vdekjen e pesë personave, ndërsa një viktimë tjetër u regjistrua në rajonin e Sumy-t.
Kompania shtetërore e energjisë, Ukrenergo, bëri të ditur se sulmet kanë shkaktuar ndërprerje të energjisë elektrike në pesë rajone të Ukrainës veriore, lindore dhe jugore. Sipas Forcave Ajrore të Ukrainës, mbrojtja ajrore arriti të interceptonte 582 dronë dhe 50 raketa nga totali i lëshuar prej 611 dronësh dhe 70 raketash.
Nga ana tjetër, autoritetet në Moskë deklaruan se forcat ruse kryen këto sulme masive ndaj objekteve ushtarako-industriale në Kiev, Kharkiv dhe Dnipro si kundërpërgjigje ndaj sulmeve ukrainase, duke mohuar goditjen e katedrales historike. Ndërkohë, autoritetet lokale në qytetin rus të Tulës njoftuan se një sulm me dron ukrainas shkaktoi vdekjen e tre personave dhe plagosi tre të tjerë.