Ministri në detyrë i Punëve të Brendshme, Xhelal Sveçla, ka njoftuar se ka themeluar grupin punues për përgatitjen e modaliteteve të programit të pensionimit të parakohshëm në Policinë e Kosovës.
Grupi punues mbajti takimin e parë dhe do të organizojë konsultime, takime pune dhe sesione dëgjimore me strukturat e policisë në nivel qendror dhe lokal. Qëllimi është identifikimi i sfidave operative dhe i nevojave reale që lidhen me këtë proces.
Sipas njoftimit, në kuadër të analizës do të shqyrtohet mundësia e zbatimit gradual të programit, duke filluar nga mosha 63 vjeç dhe duke u ulur progresivisht deri në moshën 55 vjeç, në përputhje me kapacitetet financiare dhe nevojat institucionale.
Ky proces synon menaxhim më të mirë të burimeve njerëzore, rritje të efikasitetit operacional dhe forcim të sigurisë publike.
Përditësime
Xhelal Sveçla theksoi se programi do të krijojë një polici më funksionale. “Përmes këtij programi, do të ndërtojmë një polici më të balancuar në strukturë dhe më të gatshme për t’iu përgjigjur sfidave bashkëkohore të sigurisë, duke respektuar kontributin dhe dinjitetin e secilit zyrtar policor”, tha ministri.