Sylvinho, trajner i Kombëtares Shqiptare të futbollit, ka dhënë një intervistë për mediat braziliane para ndeshjes vendimtare me Poloninë. Ai shprehu optimizmin për kualifikimin, duke theksuar se në rast suksesi, Shqipëria do të luajë me Ukrainën ose Suedinë.
Sipas trajnerit brazilian, kjo është një arritje e jashtëzakonshme për futbollin shqiptar. “Kemi bërë një punë të shkëlqyer me djemtë dhe kemi besim”, deklaroi ai. Sylvinho e cilësoi ndeshjen me Poloninë si shumë të vështirë, por theksoi fokusin maksimal te kjo sfidë.
Trajneri ndaloi edhe te përvoja personale në Shqipëri. “Unë kurrë nuk jam trajtuar në këtë mënyrë si në Shqipëri. Shqiptarët janë shumë të sjellshëm, sidomos me të huajt. Unë kam luajtur në klube dhe qytete të mëdha, por kurrë nuk jam ndier si në Tiranë. Më ndodh shpesh që të shkoj në restorant me bashkëshorten dhe në fund të më thonë që faturën e ka paguar dikush aty ngjitur. Shqiptarët janë të jashtëzakonshëm”, u shpreh ai.
I pyetur për shortin e Botërorit, Sylvinho u tregua i sinqertë. “Do të isha hipokrit nëse do të thosha që nuk e kam parë shortin për të kuptuar se me kë do të luajmë në rast kualifikimi. Por ne jemi të fokusuar maksimalisht vetëm te ndeshja me Poloninë”, përfundoi trajneri i Kombëtares.