Deputetja e Partisë Demokratike, Jorida Tabaku, gjatë fjalës së saj në Kuvend, vlerësoi se protestat e qytetarëve për projektin e resortit në Zvernec janë shprehje e një revolte ndaj një sistemi që ka deformuar interesin publik. Sipas saj, ky mosbesim rrjedh nga mënyra sesi qeveria trajton pasuritë kombëtare.
Tabaku shprehu kritika të ashpra për Ligjin për Investimet Strategjike, të cilin e konsideroi si një rrezik për vendin. Ajo argumentoi se ky legjislacion cënon të drejtën e pronës, duke lejuar shtetin të ndërhyjë në marrëveshjet mes pronarëve legjitimë. Ajo theksoi se ligji, i cili lindi si masë e përkohshme, sot është shndërruar në një instrument të përhershëm që shërben për privilegje.
Në lidhje me aktivitetin e saj opozitar, Tabaku bëri me dije se ka bashkëpunuar me organizatat e shoqërisë civile për të dërguar çështjen e aeroportit të Vlorës dhe ndryshimet në ligjin për Zonat e Mbrojtura për shqyrtim në Komisionin dhe Parlamentin Europian. Ajo nënvizoi se mungesa e debatit publik dhe trajtimi i Shqipërisë si një pronë personale janë shqetësimet kryesore që e kanë shtyrë t'i bashkohet protestave të qytetarëve si një angazhim qytetar.