Deputetja e Partisë Demokratike, Jorida Tabaku, reagoi me një video në rrjetet sociale ndaj vendimit të qeverisë për uljen me 20% të akcizës së karburanteve.
Ajo e cilësoi këtë si pranim të vonuar të një fakti të ngritur nga opozita prej më shumë se një dekade. Sipas Tabakut, për 12 vite me radhë qeveria ka mohuar ndikimin e taksave në çmimin e karburantit, ndërsa tani, përballë rritjes së çmimeve mbi 200 lekë/litr, ka detyrimin të ndërhyjë.
Tabaku thekson se barra fiskale ka qenë faktor kryesor në mbajtjen e çmimeve në nivele të larta. Ajo vlerëson se Shqipëria ka një nga çmimet më të larta të karburanteve jo vetëm në rajon, por edhe krahasuar me vendet e Bashkimit Europian, ku rreth 60% e çmimit përbëhet nga taksat.
Kjo situatë, sipas saj, ka rritur koston e jetesës, pasi çmimi i karburantit reflektohet në çdo produkt dhe shërbim. Tabaku ngriti shqetësimin për strukturën e tregut, ku një numër i kufizuar kompanish dominojnë sektorin, ndërsa mungesa e konkurrencës dhe e ndërhyrjeve rregullatore e ka përkeqësuar.
Ajo akuzon qeverinë se ka përfituar nga rritja e çmimeve përmes të ardhurave më të larta në buxhet, në vend që të mbrojë qytetarët. Deputetja e PD-së kërkoi diskutim transparent në Parlament për çmimet e karburanteve dhe taksat e larta, duke theksuar se qytetarët kanë mbajtur barrën kryesore.
Sipas Tabakut, është e nevojshme një qasje e re për çmime më të drejta dhe treg më të hapur në funksion të konsumatorit.