Deputeti Besnik Tahiri nga Aleanca për Ardhmërinë e Kosovës (AAK) foli në Kuvendin e Kosovës pas prezantimit të kabinetit qeveritar nga mandatarit për kryeministër Albin Kurti.
Tahiri theksoi se deputetët nuk patën mundësi të shqyrtonin paraprakisht programin qeverisës apo përbërjen e kabinetit. "Ne si deputetë, si grupe parlamentare, do duhej të reflektonim mbi një program, mbi një ekspoze, mbi një kabinet të kësaj qeverie, të cilën as nuk e kemi parë, as nuk e kemi lexuar, por e kemi dëgjuar prej kandidatit për kryeministër në këtë foltore. Bile i lexoi aq shpejt, sa u habita", tha ai.
Ai u ndal te numri i anëtarëve të kabinetit. "Kjo është qeveria më e madhe. Një kabinet i përbërë prej 21 ministrash e zëvendëskryeministrash. Kryeministër, a e din çka ke thënë kur e ke marrë mandatin? A e ke ditur që ke themeluar një kabinet qeveritar që është i përmasave të shtetit të Kinës, jo të Kosovës me 1.7 milionë banorë?", deklaroi Tahiri.
Sipas tij, ky kabinet nuk është gjë tjetër veçse akomodim i një pushteti të marrë në mënyrë demokratike, partiak, që synon shtyrjen e një agjende puro partiake dhe politike. "Unë sot nuk kam fjalim për programin, vizionin, idetë e kryeministrit se çka do të bëjë me Kosovën", shtoi ai.
Tahiri premtoi se AAK do ta mbështesë qeverinë në çdo punë apo projekt të mirë në Kuvend, pavarësisht nevojës për votat e tyre. Megjithatë, ajo do të ballafaqohet me vendimet që konsideron të padrejta dhe kundër interesit publik të qytetarëve të Kosovës.