Taulant Balla, deputet i Partisë Socialiste, reagoi ndaj kërkesës së Zyrës së Prokurorit Special (ZPS) në Hagë për dënim me 45 vjet burgim për secilin nga katër ish-krerët e Ushtrisë Çlirimtare të Kosovës (UÇK), në total 180 vjet.
Reagimi erdhi pas fillimit të fjalës përfundimtare në procesin gjyqësor ndaj Hashim Thaçit dhe bashkëpunëtorëve, të hënën në Hagë.
Balla e cilësoi kërkesën si “akuzë të turpshme e mbushur fund e krye me trillime, me qëllim baltosjen e luftës çlirimtare të UÇK-së”. Ai theksoi se e njëjta prokurori kishte kërkuar më parë dënime më të ulta për “xhelatët pushtues”, përgjegjës për 12 mijë të vrarë, 20 mijë gra dhe vajza të përdhunuar, si dhe 1600 persona të zhdukur.
Balla bëri thirrje për pjesëmarrje në protestën e 17 shkurtit në sheshin Skënderbeu në Prishtinë, me moton “Drejtësi, jo politike”. Kjo datë përkon me 18-vjetorin e Pavarësisë së Kosovës.
Në postimin e tij, ai shkroi: “Mbi kombin shqiptar është zbrazur dje në Hagë një akuzë e turpshme e mbushur fund e krye me trillime, me qëllimin e vetëm baltosjen e luftës çlirimtare të UÇK. Ironia është se e njëjta prokurori ka kërkuar vite më parë dënime shumë më të ulta për xhelatët pushtues, përgjegjës për 12 mijë bij e bija nënash të cilëve ju grabit jeta, për 20 mijë gra dhe vajza që u përdhunuan, për 1600 persona të tjerë të vdekur e të pakallur, ose si i thonë në gjuhën burokratike të Hagës, rezultojnë të zhdukur. Prandaj mos mungoni më 17 shkurt në Prishtinë! Të gjithë duhet të jemi aty”.