Kryetari i Grupit Parlamentar të Partisë Socialiste, Taulant Balla, ka reaguar lidhur me ngjarjen e rëndë të ndodhur në Ksamil, ku humbi jetën shtetasi portugez Luis Miguel Varela Mendes. Në një reagim publik, Balla vlerësoi punën e Policisë së Shtetit, e cila bëri të mundur ndalimin e autorit të dyshuar në kohë rekord.
“Humbja e jetës së një turisti të huaj nuk është në traditën e shqiptarit. Ata vijnë në Shqipëri në besën dhe mikpritjen e shqiptarit. Drejtësia duhet të bëjë detyrën dhe shembullin!”, u shpreh Balla në mesazhin e tij.
Sipas informacioneve zyrtare, për këtë krim është vënë në pranga Sokrat Vata, i cili punonte si truproja i kompleksit “Principotes”. Në kuadër të hetimeve, autoritetet kanë shoqëruar dhjetëra persona që dyshohet se mund të kenë dijeni për rrethanat e ngjarjes. Gjithashtu, është shpallur në kërkim Bekim Bulica, i cili identifikohet si administratori real i biznesit, për të cilin burimet thonë se figuron në pronësi të një të moshuare.
Përditësime
Deputeti i Partisë Demokratike, Klevis Balliu, reagoi ashpër lidhur me vrasjen e turistit portugez në Ksamil. Balliu vlerësoi se ngjarja reflekton degradimin e sigurisë publike në vend. Ai akuzoi qeverinë se ka krijuar një mjedis ku bandat kriminale kanë ndikim të drejtpërdrejtë mbi jetën e qytetarëve dhe turistëve.