Kryetari i Grupit Parlamentar të Partisë Socialiste, Taulant Balla, zhvilloi një takim me ish-Komandantin Suprem të Forcave Aleate të NATO-s në Evropë, gjeneralin amerikan Wesley Clark. Takimi u realizua në kuadër të vizitës së Balla-s në Shtetet e Bashkuara të Amerikës, ku ai po zhvillon bisedime me personalitete politike dhe përfaqësues të komunitetit shqiptaro-amerikan.
Përmes një postimi në rrjetet sociale, Balla e vlerësoi Clark për rolin udhëheqës në fushatën ajrore të vitit 1999, e cila ndërhyri për mbrojtjen e popullsisë së Kosovës nga regjimi i Sllobodan Millosheviçit. Një tjetër pikë e rëndësishme e komunikimit ishte falënderimi për dëshmitë dhe deklarimet e Clark në Hagë, në mbështetje të komandantëve të UÇK-së dhe për atë që Balla e cilësoi si pastërtia e luftës çlirimtare.
"Ia shtrëngova dorën fort me dy herë mirënjohje këtij burri të veçantë. Wesley Clark ishte Komandant Suprem i Forcave Aleate të NATO-s në Evropë dhe drejtoi fushatën e NATO-s në vitin 1999, në mbrojtje të popullsisë së Kosovës dhe kundër represionit të regjimit të Millosheviçit. Së dyti, mirënjohje për deklarimet dhe dëshmitë në Hagë në mbështetje të komandantëve dhe pastërtisë së luftës çlirimtare të UÇK-së", shkroi Balla.