Taulant Balla, drejtuesi politik i Partisë Socialiste për Qarkun e Tiranës, zhvilloi më 23 mars 2026 mbledhjen e Asamblesë së Zgjeruar të PS në Kavajë. Kjo mbledhje shënoi nisjen e procesit të forcimit të strukturave organizative në këtë bashki, në prag të zgjedhjeve lokale të ardhshme.
Në postimin e tij në rrjetet sociale, Balla theksoi se Shqipëria regjistroi në vitin 2025 rekordin historik të turistëve të huaj. Ai vlerësoi Kavajën me bregdetin e saj si destinacion të lakmuar turistik, duke nxitur rritjen e bizneseve lokale dhe të ardhurave për banorët dhe Bashkinë.
Balla deklaroi se ky sukses po bëhet shënjestër e qëllimshme e opozitës. Sipas tij, molotovët e Sali Berishës duan të godasin ekonominë turistike, me shpresën se dëmtimi i turizmit dhe imazhit të Shqipërisë do të sjellë vota në zgjedhjet e 2029.
Postimi i plotë i Ballës:
“Kavajë. Filluam sot me Asamblenë e PS procesin e forcimit të strukturave tona në këtë bashki. Ndërsa Shqipëria shënoi në vitin 2025 rekordin historik të turistëve të huaj, Kavaja me bregdetin e saj merr një vend të rëndësishëm si destinacion i lakmuar turistik. Kjo rritje e paimagjinueshme ka çuar në rritjen e bizneseve të zonës dhe të të ardhurave për banorët dhe Bashkinë. Molotovët e Sali Berishës duan të godasin pikërisht ekonominë turistike, me shpresën e këtij të plaku të rrjedhur se duke dëmtuar turizmin dhe imazhin e Shqipërisë, shqiptarët do t’i japin atij votën në Zgjedhjet e vitit 2029.”