Të paktën 9 persona kanë humbur jetën dhe 20 të tjerë janë plagosur si pasojë e një sulmi me raketë iraniane në qytetin izraelit Beit Shemesh, mesditën e së dielës.
Shërbimi izraelit i emergjencës Magen David Adom (MDA) bëri të ditur se ekipet mjekësore po trajtojnë edhe disa të plagosur të tjerë pas goditjes. Midis të lënduarve ndodhet një vajzë në gjendje të rëndë shëndetësore. Beit Shemesh ndodhet rreth 30 kilometra në perëndim të Jerusalemit.
Më herët ishte raportuar për dy viktima izraelite nga sulmet iraniane, por bilanci i fundit flet për një numër më të lartë të të vdekurve dhe të plagosurve.
Ndërkohë, nga sulmet iraniane kanë humbur jetën edhe tre persona në Emiratet e Bashkuara Arabe dhe një tjetër në Kuwait, duke zgjeruar pasojat e përshkallëzimit të konfliktit në rajon.