Dritan Burgija dhe Arlind Boshku, të përjashtuar nga Partia Demokratike në Durrës si këshilltarë në Bashkinë Durrës, u paraqitën sot në selinë qendrore të partisë, ku kërkuan ballafaqim me kryedemokratin Sali Berishën lidhur me vendimin e përjashtimit.
Vendimi u mor një javë më parë nga sekretari i PD-së në Durrës, Flamur Noka. Sipas Sali Berishës, të dy këshilltarët nuk kanë shpërblyer votat e demokratëve në Këshillin Bashkiak, por kanë shkuar vetëm për të marrë rrogën dhe kanë vepruan kundër interesave të partisë.
Dritan Burgija, duke folur për mediat, e konsideroi vendimin anti-statutor. "Jam këtu për të kërkuar shpjegime për përjashtimin tim. Çdo rresht i vendimit është anti-statutor, kam kërkuar ballafaqim me lidershipin dhe kam kërkuar fakte dhe prova që çuan në vendimin e shkarkimit tim. Jemi këtu bashkë dhe me insistimin e këtyre demokratëve kërkojmë, nëse është e mundur, të bëjmë një ballafaqim me z. Berishën, pasi jemi rënduar shumë me akuzat. Janë akuza shumë të rënda, për mua dhe kolegun tim. Ja ku jemi dhe të ballafaqohemi, sepse i detyrohemi këtyre demokratëve", deklaroi ai.
Të dy identifikohen si mbështetës të Ervin Salianjit. I pyetur për akuzat e mundshme për bashkëpunim me Partinë Socialiste, Burgija i mohoi ato. "Nuk kemi bashkëpunuar, është gënjeshtër shumë e madhe. Parkimi është pronë private dhe unë jam pronar. Nëse është ky shkaku, kanë gabuar rëndë", u shpreh ai, duke premtuar të vërë në dispozicion certifikatën e pronësisë.