Më 17 tetor, të rinjtë protestuan në Durrës, Shkodër, Korçë dhe Elbasan, me thirrje kundër qeverisë dhe kryeministrit Edi Rama. Në Durrës pati dëmtime të pronës dhe ndërhyrje të policisë; në qytetet e tjera u zhvilluan marshime dhe u kërkua lirimi i të ndaluarve.
Durrës
Në Durrës, protestuesit u mblodhën pranë bashkisë dhe marshuan nëpër qytet. Sipas Shqiptarja.com dhe Report TV, rreth 50–60 të rinj u nisën nga Pallati i Kulturës, kaluan pranë Mauzoleut të Dëshmorëve dhe shkuan te Posta Shqiptare, ku thyen xhamat, goditën derën dhe përmbysën kosha. Burimet raportuan edhe djegie koshash dhe dëmtim të sinjalistikës rrugore. NOA përmendi hedhjen e gurëve drejt bashkisë dhe dëmtimin e kangjellave dekorative.
Policia arrestoi ose shoqëroi disa protestues. Sipas NOA-s, ndërhyrja ndodhi pasi protestuesit dëmtuan postën dhe po përpiqeshin t’i afroheshin drejtorisë së policisë. Hashtag.al, Balkan Web dhe NOA raportuan se të rinjtë u bënë thirrje punonjësve të policisë të hiqnin uniformat dhe t’u bashkoheshin, duke akuzuar qeverinë për korrupsion. Gazeta Blic veçoi thirrjet kundër Edi Ramës dhe kreut të Partisë Demokratike, Sali Berisha.
Sipas Shqiptarja.com dhe Report TV, protestuesit e konsideronin Postën simbol të vjedhjes, pas hetimit për të paktën 700 mijë euro, ku përmenden ish-drejtoresha dhe disa punonjëse të institucionit. Protestues të tjerë u ulën para policisë dhe kërkuan lirimin e të ndaluarve. Gjykata caktoi masën “detyrim për t’u paraqitur në policinë gjyqësore” për dy të mitur të arrestuar dy ditë më parë.
Shkodër, Korçë dhe Elbasan
Në Shkodër, të rinjtë marshuan dhe dogjën kosha mbeturinash. Policia liroi pesë të ndaluar, mes tyre një fëmijë 10-vjeçar, dhe protestuesit u kthyen para bashkisë.
Në Korçë, të rinjtë marshuan në pedonale me thirrjet “Bashkohuni me ne” dhe “Edi Rama, jep dorëheqjen”. Mësuesi i gjimnazit “Themistokli Gërmenji”, Leonidha Puqi, tha se nxënësit e kishin ftuar dhe u kërkoi të shmangnin dhunën e të vijonin protestën në mënyrë paqësore.
Në Elbasan, protestuesit dogjën kosha dhe thyen tabela. Tubimi përfundoi para bashkisë, ku protestuesit dhe efektivët u përqafuan dhe bënë një fotografi të përbashkët.