Javier Tebas, presidenti i La Ligës, reagoi ashpër ndaj deklaratave të trajnerit të Real Madridit, Alvaro Arbeloa, lidhur me vendimet e gjyqtarëve në kampionatin spanjoll.
Këto komente erdhën pas ndeshjes së fundit të Real Madridit ndaj Gironës, ku Arbeloa vuri në dyshim standardin e gjykimit. Ai sugjeroi se vendimet kontroverse mund të shpjegojnë suksesin më të madh të madrilenëve në garat evropiane krahasuar me ato vendore.
Tebas i hodhi poshtë këto ankesa, duke thënë se Arbeloa përdor të njëjtin stil argumentimi si në rastin e gjyqtarit në ndeshjen ndaj Bayern Munich. "Një ditë thotë një gjë, pastaj një tjetër, pastaj diçka tjetër", u shpreh kreu i La Ligës, sipas Mundo Deportivo.
Ai u bëri thirrje madrilenëve të përqendrohen te gara për titull. "Real Madridi duhet të përpiqet të vazhdojë të garojë. Ka ende ndeshje në La Liga dhe ka mjaft pikë në lojë", deklaroi Tebas.
Sa i përket Barcelonës, ai minimizoi mundësinë e mbylljes së hershme të garës. "Barcelona nuk do t’i fitojë të gjitha, larg kësaj. Jam i bindur për këtë. Ka ende pikë për t’u luftuar", përfundoi presidenti i La Ligës.