Vala rekord e të nxehtit që ka përfshirë Shtetet e Bashkuara ka ndikuar në mbarëvajtjen e festimeve të Ditës së Pavarësisë, duke vënë në rrezik sigurinë e qytetarëve. Sipas Shërbimit Kombëtar të Motit, temperaturat ekstreme kanë goditur kryesisht zonat e Bregut Lindor dhe rajonin e Midwest-it, ku në qytete si Filadelfia dhe Uashington parashikohen vlera deri në 41 gradë Celsius.
Në kryeqytet, organizatorët morën vendimin për mbylljen e përkohshme të Panairit Shtetëror Amerikan në National Mall, pas raportimeve se disa pjesëmarrës shfaqën probleme shëndetësore dhe kërkuan ndihmë mjekësore. Po ashtu, autoritetet ndryshuan oraret e koncerteve, përfshirë "A Capitol Fourth", dhe shtynë hyrjen për shfaqjen e fishekzjarrëve për të shmangur ekspozimin e publikut gjatë orëve më të nxehta.
Përtej kryeqytetit, shumë aktivitete tradicionale, përfshirë paradën kryesore në Filadelfia, janë anuluar plotësisht. Autoritetet vendore në shtetet e prekura, përfshirë Pennsylvania, New Jersey, Maryland dhe Colorado, kanë lëshuar paralajmërime për rrezik të lartë, duke këshilluar qytetarët të shmangin qëndrimin e zgjatur në ambient të hapur.
Ndërkohë, komisioni "America 250" njoftoi se po monitoron kushtet atmosferike për aktivitetet e tjera. Meteorologët paralajmërojnë se vapa mund të vazhdojë përgjatë gjithë fundjavës, ndërsa në disa rajone ekziston rreziku edhe për stuhi të forta.
Përditësime
Autoritetet zgjeruan alarmin për të nxehtin ekstrem, duke përfshirë tashmë 185 milionë qytetarë amerikanë. Temperaturat shënuan rekorde historike: Nju Jorku arriti 38°C, niveli më i lartë që nga viti 2012, ndërsa Filadelfia preku 39°C, shifër që nuk regjistrohej që nga viti 2011. Përditësimet e fundit përfshijnë:
- Zyrtarët lokalë anuluan festimet në Takoma Park, Maryland dhe Loudoun County, Virginia.
- Shërbimi i Parqeve Kombëtare instaloi tenda ftohëse dhe stacione spërkatjeje në National Mall për të mbrojtur vizitorët.
- Meteorologët paralajmëruan rrezik për stuhi, breshër dhe tornado në rajonin e Midwest pas valës së vapës.
- Efektet termike po shkaktojnë probleme edhe në Kebek, Kanada, si dhe po ndikojnë në zhvillimin e ndeshjeve të Kupës së Botës.