Protesta qytetare në kryeqytet ka vijuar për të 13-ën ditë radhazi, e shoqëruar nga tensione në orët e vona të mbrëmjes. Pas përfundimit të festimeve të Partisë Socialiste në sheshin Italia, të organizuara për 35-vjetorin e themelimit të kësaj force politike, një grup mbështetësish iu afrua zonës ku po zhvillohej protesta.
Sipas raportimeve, pati përplasje midis këtyre mbështetësve dhe tubuesve që po mbanin fjalime përpara godinës së Kryeministrisë. Pas incidenteve, protestuesit nisën një marshim nëpër rrugët kryesore të kryeqytetit, duke brohoritur thirrje si: "Rama n'burg, Berisha n'burg".
Gjatë fjalimeve të mbajtura para përshkallëzimit të situatës, aktivisti Alben Kola u shpreh se lëvizja qytetare nuk duhet të ndikohet nga përpjekjet e opozitës për ta kontrolluar atë, duke e cilësuar protestën si një "magji të popullit".
Organizatorët u kishin bërë thirrje më herët pjesëmarrësve që të shmangnin çdo provokim dhe të mos bashkoheshin me aktivitetet në sheshin Italia. Folësit u drejtuan gjithashtu punonjësve të administratës publike, duke u bërë thirrje t'i bashkohen lëvizjes për atë që ata e konsideruan si shpëtimin e Shqipërisë.