Përplasjet fizike ndodhën në periferi të protestës, konkretisht te kryqëzimi pranë Kryeministrisë, në kohën kur po mbaheshin fjalimet e protestuesve. Sipas dëshmive nga vendngjarja, grupi i mbështetësve të Partisë Socialiste përbëhej nga rreth 30-40 persona, të cilët janë afruar në zonë duke nxitur reagime verbale dhe fizike.
Gazetarja Kristi Gongo raportoi se konflikti filloi fillimisht me shkëmbime verbale, pas të cilave një pjesë e protestuesve u larguan me vrap drejt sheshit Nënë Tereza. Pjesa tjetër e tubuesve ndërhyri për të rikthyer qetësinë dhe për të shmangur përshkallëzimin e mëtejshëm të situatës, duke u bërë thirrje pjesëmarrësve që të mos bien pre e provokimeve.
Ndërhyrja e forcave të Policisë bëri të mundur shpërndarjen e grupeve dhe kthimin e normalitetit. Situata në perimetrin e institucionit vazhdon të monitorohet nga forcat e rendit.