Protesta e zhvilluar para Parlamentit ka degjeneruar në përplasje të dhunshme, duke shkaktuar plagosjen e 9 punonjësve të policisë dhe shoqërimin e 23 personave në polici. Tensionet u transferuan më pas para Komisariatit Nr. 1, ku po mbahen të ndaluarit.
Situata u rëndua kur deputeti Erald Kapri njoftoi se 4 prej të ndaluarve pritej të liroheshin pa akuza brenda një ore. Ky njoftim nxiti reagimin e protestuesve, të cilët shprehën pakënaqësi ndaj klasës politike, duke u bërë thirrje deputetëve të dorëzojnë mandatet dhe duke i akuzuar ata për "opozitë të shitur".
Në ambientet pranë komisariatit u shënuan debate të ashpra mes protestuesve dhe figurave politike të pranishme, si Luçiana Kokaj, Klevis Balliu dhe Redi Muçi. Përplasjet verbale u shtuan kur Dritan Goxhaj iu afrua Klevis Balliut, moment që u interpretua nga protestuesit si një përpjekje për negociata me Partinë Demokratike. Protestuesit i kërkuan largimin, duke kundërshtuar çdo ndërmjetësim me përfaqësuesit e opozitës.